समाचारसमाज

जेनजी आन्दोलनमा सप्तरीका एक जना युवा माथि गोली प्रहार, अवस्था गम्भीर

पब्लिक प्रेस ।

सप्तरी ।

जेनजी आन्दोलनका क्रममा काठमाडौंमा प्रहरीले चलाएको गोली लागेर सप्तरीका एक युवा गम्भीर घाइते भएका छन्। हनुमाननगर कङ्कालिनी नगरपालिका–४, मधुवापुर निवासी शम्भु मण्डलका १८ वर्षीय छोरा निरज मण्डललाई हिजो आन्दोलनका क्रममा गोली लागेको हो।

निरजलाई काठमाडौंस्थित केएमसी अस्पतालमा उपचारका लागि भर्ना गरिएको छ। उहाँको गाउँले अनुसार उनको अवस्था अत्यन्तै चिन्ताजनक छ। गोली कमरकाे भागमा लागेको बताइएको छ, तर अहिलेसम्म न त प्रहरीले न त अस्पताल प्रशासनले आधिकारिक जानकारी सार्वजनिक गरेका छन्।

सरकारी निकायको चुप्पी र लापरवाहीप्रति परिवारजन र स्थानियबासी आक्रोशित छन्। शान्तिपूर्ण आन्दोलनमा सहभागी निहत्था विद्यार्थीमाथि गोली प्रहार हुनु, त्यो पनि ज्यानै जाने खतरा हुने गरी, लोकतन्त्र र मानव अधिकारमाथिको खुला हमला हो।

यसैबीच, जेनजी आन्दोलनमा हालसम्म देशभरबाट १९ जनाको मृत्यु भएको पुष्टि भइसकेको छ भने दर्जनौं घाइते भएका छन्। राज्यद्वारा आफ्नै नागरिकमाथि गरिएको यो निर्मम दमनको चौतर्फी विरोध भइरहेका बेला सप्तरीका एक युवकमाथि भएको गोली प्रहारले सरकारको चरम अमानवीयता उजागर भएको छ।

जनताको अभिव्यक्ति स्वतन्त्रता र विरोध जनाउने अधिकारलाई कुच्दै युवाहरूमाथि गोली चलाउने काम तत्काल बन्द गर्नुपर्ने आवाज चर्किँदै गएको छ।

सप्तरीलगायत देशभरका युवाहरू हिजाेकाे घटना प्रति विरोधका लागि सडकमा उत्रन थालेका छन्।

पब्लिक प्रेस न्यूजडेस्क

"पब्लिक प्रेस न्यूज डेस्क" यस अनलाइन पोर्टलको आधिकारिक समाचार इकाई हो। यो न्यूज डेस्कले मुख्यतया मधेश प्रदेश, विशेष गरी सप्तरी जिल्ला र आसपासका राजनीतिक, सामाजिक, धार्मिक तथा समसामयिक घटनाहरूलाई समेट्ने गर्दछ।

जवाफ लेख्नुहोस्

तपाईँको इमेल ठेगाना प्रकाशित गरिने छैन। अनिवार्य फिल्डहरूमा * चिन्ह लगाइएको छ

Back to top button