सप्तरी, हनुमाननगर: आज हनुमाननगरमा सुरु भएको कोसिया ३ कार्यक्रमको पहिलो सत्रमा ख्यातिप्राप्त साहित्यकार तथा कलाकार धीरेन्द्र प्रेमर्षिले छठ पर्वको महत्वबारे चर्चा गर्दै, यस पर्वले साधारण मानिसलाई पण्डित वा कुनै मध्यस्थकर्ताको आवश्यकता बिना नै सिधै भगवान् र प्रकृतिको पूजा गर्न साक्षात अवसर प्रदान गरेको बताउनुभयो।
यो दुई-दिने कोसिया कार्यक्रमको पहिलो दिन, हनुमाननगरमा आइ लभ मिथिलाद्वारा आयोजित छठ पर्वसम्बन्धी कार्यक्रमको उद्घाटन सत्रमा प्रमुख अतिथि सरिया सिपलियाले यस कार्यक्रमलाई गर्वको विषय भएको बताइन्। विभिन्न सत्रहरू यस कार्यक्रममा समेटिएका थिए, जसले विविध पक्षहरूको उजागर गरेको थियो।
‘इतिहासक स्वर्णिम डगर’ शीर्षक सत्रमा डा. पिताम्बर लाल यादव, बंशीधर कवडा, र पं. गोविन्द मिश्र वक्ताका रूपमा सहभागी भए भने प्रस्तोता पत्रकार आर.एन. विश्वास र विषय प्रवेश कमल मण्डलले गराए। हनुमाननगरको गौरवमय इतिहास भए पनि यसको अनुसन्धान र प्रचारमा कमी रहेको कुरामा डा. यादवले जोड दिनुभयो। स्थानीय उद्योगपति बंशीधर कवडाले भने ऐतिहासिक विवरण सुरक्षित रहे पनि सरकारी स्तरमा यसको उपेक्षा भइरहेको र यसलाई धार्मिक पर्यटकीय क्षेत्रका रूपमा विकास गर्न आवश्यक रहेको बताए।
साहित्य सरोवर सत्रमा अनन्या राय, उर्जा साह, हरिओम मेहता, अभय यादव, अशोक अमन, र मनोहर पोखरेलले आफ्ना रचनाहरू प्रस्तुत गरे, जसको संयोजन विद्यानन्द वेदर्दिले गरेका थिए। कार्यक्रमको अध्यक्षता नारायण ठाकुरले गरेका थिए, भने स्वागत मन्तव्य सत्रुघन प्रसाद राय र रवि शर्माले दिए। मधेश प्रदेशको आमसंचार प्राधिकरणका अध्यक्ष श्यामसुन्दर यादवले, “परती परेको जमिनमा एकपटक मात्र अन्न फल्दैन, समाज सुधारका लागि युवाहरूको निरन्तरता आवश्यक छ,” भन्ने धारणा व्यक्त गरे।
स्थानीय युवा धीरेन्द्र साहले ‘आइ लभ मिथिला’लाई आफ्नो प्रतिक्रिया दिँदै, “यस कार्यक्रमले हाम्रो आत्मविश्वासमा वृद्धि गरेको छ, र हनुमाननगरमा बौद्धिक स्तरका कार्यक्रमहरूको सम्भावना अझै जीवित रहेको देख्यौं,” भने।
कार्यक्रममा इन्टेलेक्चुअल फाउण्डेशनका अध्यक्ष डा. सूर्य प्रसाद यादव, मिलाफ नेपालकी अध्यक्ष रमिला साह, मधेश प्रज्ञा प्रतिष्ठानका सदस्य दिनेश यादव, आमसंचार प्राधिकरणका अध्यक्ष श्यामसुन्दर यादव, गायिका ज्योति विश्वार्कमा, करूणा झा, रूपा झा र वडा नं. ९ का अध्यक्ष हरिशचन्द्र वर्मा लगायतको उपस्थिति थियो। कार्यक्रमको अध्यक्षता छठ पूजा समितिका अध्यक्ष नारायण ठाकुरले गरेका थिए। कार्यक्रमको सञ्चालन रुबी मिश्र र गजेन्द्र गजुरले गरेका थिए। आयोजक समितिले भोलि साँझ ७ बजे दोस्रो दिनका सत्र हुने जानकारी दिएको छ।










