समाज

सप्तरीको बभनगामामा विनाशकारी आगलागी, घरसँगै सपना पनि जले

पब्लिक प्रेस ।
सप्तरीको तिलाठी कोईलाडी गाउँपालिका–६ बभनागामामा शनिबार साँझ भएको भीषण आगलागीमा १२ घरमा क्षति पुगेको छ। आगलागीबाट ६ वटा घर पूर्ण रूपमा जलेर नष्ट भएका छन् भने ५ वटा घरमा आंशिक क्षति पुगेको प्रहरीले जनाएको छ।
प्रहरीका अनुसार स्थानीय रामअवतार यादवले घरमा बालेको घुरबाट साँझ करिब ७: बजे अचानक आगलागी भएको थियो। आगो तीव्र रूपमा फैलिँदा गाउँका घरहरूमा ठूलो क्षति पुगेको हो। घटनामा ४ वटा खसी/बाख्रा जलेर मरेका छन् भने कुनै मानवीय क्षति भएको छैन।
आगलागी नियन्त्रणका लागि बिओपी बर्साईनबाट सप्रनिको कमाण्डमा ९ जना, प्रहरी चौकी को–बर्साईनबाट प्रसनि नेतृत्वमा ४ जना, नेपाली सेनाको बरख गण राजविराजबाट उपसेनानीको कमाण्डमा ७ जना सुरक्षाकर्मी परिचालन गरिएको थियो।
त्यसैगरी हनुमाननगर कंकालिनी नगरपालिकाको एक वटा दमकल, कोशी प्रोजेक्टका चार वटा पानी ट्याङ्कर तथा स्थानीयवासी गरी करिब ५०/६० जनाको सहभागितामा आगो नियन्त्रणमा लिइएको थियो। आगो राति करिब १०:३५ बजे पूर्ण रूपमा नियन्त्रणमा आएको प्रहरीले जनाएको छ।
प्रहरीका अनुसार आगलागीबाट करिब ३५ लाख ५० हजार रुपैयाँ बराबरको क्षति भएको छ।
आगलागीमा अनिल यादवको घरमा रहेको ४ तोला चाँदी, नगद १ लाख रुपैयाँ, खाद्यान्न, लत्ताकपडा तथा महत्वपूर्ण कागजात जलेर करिब ५ लाख रुपैयाँ बराबरको क्षति भएको छ।
यस्तै जुगेश्वर यादवको घरमा रहेको २ तोला सुन, १० तोला चाँदी, नगद २ लाख रुपैयाँ, ४ वटा खसी/बाख्रा, खाद्यान्न तथा अन्य सामग्री जलेर करिब ८ लाख रुपैयाँ बराबरको क्षति भएको प्रहरीले जनाएको छ।
त्यसैगरी जोगिन्दर यादवको घरमा १ तोला सुन, १० तोला चाँदी, नगद २ लाख रुपैयाँ, एलइडी टिभी, खाद्यान्न तथा कागजात जलेर करिब ६ लाख रुपैयाँ बराबरको क्षति भएको छ। अर्का अनिल यादवको घरमा २ तोला सुन, २ तोला चाँदी र नगद २० हजार रुपैयाँसहित करिब ४ लाख ५० हजार रुपैयाँ बराबरको क्षति पुगेको छ।
रमन कुमार यादवको घरमा १२ आना सुन, ३० तोला चाँदी, नगद १ लाख रुपैयाँ तथा अन्य सामग्री जलेर करिब ४ लाख रुपैयाँ बराबरको क्षति भएको छ भने योगेन्द्र यादवको घरमा २ तोला सुन, १० तोला चाँदी र नगद २ लाख रुपैयाँसहित करिब ८ लाख रुपैयाँ बराबरको क्षति भएको छ।
यस्तै बिद्यानन्द यादव, सदानन्द यादव, जरी यादव, श्रवण कुमार यादव र राजकुमार यादवको घरमा आंशिक क्षति पुगेको प्रहरीले जनाएको छ।

पब्लिक प्रेस न्यूजडेस्क

"पब्लिक प्रेस न्यूज डेस्क" यस अनलाइन पोर्टलको आधिकारिक समाचार इकाई हो। यो न्यूज डेस्कले मुख्यतया मधेश प्रदेश, विशेष गरी सप्तरी जिल्ला र आसपासका राजनीतिक, सामाजिक, धार्मिक तथा समसामयिक घटनाहरूलाई समेट्ने गर्दछ।

जवाफ लेख्नुहोस्

तपाईँको इमेल ठेगाना प्रकाशित गरिने छैन। अनिवार्य फिल्डहरूमा * चिन्ह लगाइएको छ

Back to top button