पब्लिक प्रेस ।
नयाँ दिल्ली, भारतको राजधानी नयाँ दिल्लीस्थित ऐतिहासिक तालकटोरा स्टेडियममा आयोजित ‘रेजाङ्ला शौर्य एवं यदुकुल सम्मान दिवस’ समारोहमा नेपाल यादव युवा संघको गौरवपूर्ण प्रतिनिधित्व भएको छ। समारोहमा संघका केन्द्रीय सदस्य तथा प्रतिनिधि राजा यादवले राष्ट्रिय अध्यक्ष अधिवक्ता चन्द्र यादवको तर्फबाट सम्मानपत्र तथा स्मृतिचिह्न ग्रहण गरेका छन्।
बुधबार, १८ नोभेम्बर २०२६ का दिन आयोजित उक्त समारोहमा सन् १९६२ को भारत–चीन युद्धअन्तर्गत रेजाङ्ला युद्धमा मातृभूमिको रक्षाका लागि अदम्य साहस, वीरता र देशभक्तिको परिचय दिँदै वीरगति प्राप्त गरेका अहीर सैनिकहरूको योगदानको स्मरण गर्दै भावपूर्ण श्रद्धाञ्जली अर्पण गरिएको थियो। साथै यादव समुदायको ऐतिहासिक पहिचान, गौरवशाली परम्परा, सामाजिक एकता र सांस्कृतिक विरासतलाई सम्मान गर्ने उद्देश्यले कार्यक्रम आयोजना गरिएको थियो।
श्रीकृष्ण यादव महासभाका राष्ट्रिय अध्यक्ष तथा दिल्ली सरकारका पूर्व ओबीसी आयोग अध्यक्ष जगदीश यादवको आयोजनामा सम्पन्न समारोहमा मध्यप्रदेशका मुख्यमन्त्री मोहन यादव प्रमुख अतिथिका रूपमा आमन्त्रित थिए।

नेपाल यादव युवा संघका राष्ट्रिय अध्यक्ष अधिवक्ता चन्द्र यादव हाल बेलायत (यूके) मा एलएलएम (LLM) अध्ययनरत रहेकाले उहाँको अनुपस्थितिमा संघका केन्द्रीय सदस्य तथा प्रतिनिधि राजा यादवले उहाँको तर्फबाट सम्मानपत्र र स्मृतिचिह्न ग्रहण गरेका हुन्। उक्त विवरण नेपाल यादव युवा संघले समेत पुष्टि गरेको छ।
रेजाङ्ला युद्धमा वीर अहीर सैनिकहरूले प्रदर्शन गरेको अदम्य साहस र बलिदान यादव समुदायको इतिहासमा गौरवपूर्ण अध्यायका रूपमा स्मरण गरिन्छ। मातृभूमिको रक्षा, कर्तव्यनिष्ठा, त्याग र वीरताको यो इतिहासले नयाँ पुस्तालाई देशप्रेम, साहस र सामाजिक जिम्मेवारीको सन्देश दिएको छ।
भगवान् श्रीकृष्णको आदर्श, यदुवंशको गौरवशाली परम्परा तथा धार्मिक, सांस्कृतिक र सामाजिक मर्यादासँग जोडिएको यादव समुदायको पहिचानलाई अन्तर्राष्ट्रिय स्तरमा स्थापित गर्नु यस्ता समारोहको महत्वपूर्ण पक्ष रहेको छ। यादव समुदायको इतिहास केवल वंशीय पहिचानमा सीमित नभई धर्म, संस्कृति, नैतिकता, पराक्रम, सद्भाव र सामाजिक एकताको जीवन्त परम्परासँग पनि जोडिएको छ।
यस ऐतिहासिक अवसरमा नेपाल यादव युवा संघको प्रतिनिधित्व हुनु नेपाल र भारतका यादव समुदायबीचको ऐतिहासिक, धार्मिक, सांस्कृतिक तथा सामाजिक सम्बन्धलाई थप सुदृढ बनाउने महत्वपूर्ण अवसरका रूपमा हेरिएको छ। सम्मानलाई व्यक्तिगत उपलब्धिभन्दा पनि संगठनको सामूहिक पहिचान, एकता र संस्थागत प्रतिष्ठाको सम्मानका रूपमा लिइएको संघले जनाएको छ।
सम्मान ग्रहण गर्ने केन्द्रीय सदस्य राजा यादवप्रति संघले हार्दिक बधाई तथा सम्मान व्यक्त गरेको छ। साथै बेलायतमा उच्च शिक्षा हासिल गरिरहेका राष्ट्रिय अध्यक्ष अधिवक्ता चन्द्र यादवको शैक्षिक, सामाजिक तथा संगठनात्मक यात्राको सफलताको कामना गरिएको छ।
